اما صحيح انسان

--------------------------------------------------------------------------------


قالولى انت انسان
قلت غريبه ما كنتش اعرف
طب ازى هاتصرف
قالولى انت انسان
قلت لما عرفت
وايه اللى فى الامكان
لما انا انسان
.....
عرفت بعدها انى فهمت
وانى مهما فهمت
مش هفهم اكتر من انى فهمت
قلت طيب افهم
انا ليه فهمت
قالولى مش مهم تفهم دا انت يا دوب انسان
.....
مشيت فى الدنيا
والناس كتير حوليا
قلت اعمل زيهم
واكون جنبهم
قالوا بصوا..... بيعمل زى الناس
دا انسان ما عندوش احساس
لا بالمكان ولا الزمان
اما صحيح انسان
.....
قلت ما بدهاش
اخالف الناس
واعمل زى الخفاش
ينام النهار ويصحى الليل
يمشى اعمى من غير دليل
قالوا شوفوا اللى بقى من الكفار
عمال يبرطع واخره النار
اما واحد ما عندوش حسن اختيار
عاوز يقلب موازين الاكوان
اما صحيح انسان
.....
احترت
قلت طيب انا اعمل ايه
ولا ايه ولا ايه
ما لقتش حل غير انى احب
اه.. ولا.. ليه
قلت... للى بحبها فى يوم انا بحبك
قالتلى... وبعدين؟
قلت... نتجوز
قالتلى... وبعد جوازنا بسنين؟
قلت... ربنا يفرجها
قالت... اه.. بس طول ما انت كده
مش هايعدلها
قلت... بالحب الصعب يهون
وويا بعض الزمن مهما يطول
احنا مع بعض على طول
قالت... واجه الواقع وما تبقاش جبان
داللى يتحدى المستحيل يغرق فى الفيضان
وانت مجرد انسان
قلتله... طيب ما انا مش لوحدى وانتى معايا
وكل تحدى هاتبقى ويايا
قالتلى انا مش ناقصه جنان
اما صحيح انسان
.....
زهقت من الكلمادى
وقلت انا هاغير
رحت للدكتور وقلتله... انا هاغير
يا دكتر
قالى... يا ابنى دا انت انسان
وما فيش احسن من الانسانا
قلتله زهقت وفاض بيا
من الانسان ومن كل اللى حوليا
قالى براحتك
.....
ومن اليوم دا اخدت قرار
انى اعيش فى الدنيادى حمار